Sunday, February 26, 2017

නගේ තිගේ ඉඟේ රඟේ මගේ ඇඟේ නැගේ දඟේ.......

නගේ     
තිගේ      
ඉඟේ     
රඟේ     
මගේ     
ඇඟේ   
නැගේ   
දඟේ.......





(4)

Sunday, February 19, 2017

නරුම උන්ව මැරුවත් සැනසුමක් නැතී......

අව්ව වැස්ස වෙනසක් විඳගන්න නැතී
සෙව්ව සොච්චමෙන් වේලක් පිරෙණු ඇතී
ගව්ව ගව්ව දුක් මල් වැල් පිරී ඇතී
දිව්ව රටේ අප තාමත් පයින් යතී

ඇතිදා විරිය ගෙන මැරි මැරි වැඩ කරතී
මස්දා පිරුණු සිරුරම දැන් ගෙවී ඇතී
සිඳදා සිහින පැතුමන් බොඳ වෙලා ඇතී
කවදාකවත් හිරු පායා එන්නෙ නැතී

දුහුවිලි සුවඳ මල් සුවඳක් සේ දැනෙතී
ගෙරවිලි රැවුම් නිතරම අප දෙස ඇදෙතී
රැවටිලිවලින් තොර එතුමන් දැක නොමැතී
සැරසිලි කරන්නට මින් මතු අපිත් නැතී

කරුම අපිද අපි මිනිසුන් නොවණු ඇතී
උරුම නොමැති සිහිනය එළිවෙන්නෙ නැතී
හොරුම ඇවිත් ඡන්දෙට බොරු හිත් පුදතී
නරුම උන්ව මැරුවත් සැනසුමක් නැතී......


'ඇපල් වත්ත'
2017- 02- 26



(5)

Sunday, February 12, 2017

සලා පියපත් සොයා සෙනෙහස තුරුල්වුණු දින සතුට බෝමා.........

සරා සඳ මල නීල අහසක සිනාසේවි අප දෙස බලා
පෙරා සිසිලස හොවා කිරණක හැඟුම් පුබුදණු තුටුවෙලා
නුරා දෙනෙතක රැඳුණු මොහොතක ඔයා ළඟ මා මත්වෙලා
පුරා සසරක ළඟම ඉන්නට දෙසිත් එකවර පිංකළා

තාල තිය තිය පාන හුරතල දෙනෙත දසුනට ප්‍රියකළා
ආල උපදින නාද රැව්දෙන සවන මධු මී ඉහිරිලා
මාල ගෙලවට දාන පෙම්බර සිහින එකිනෙක හැඩවෙලා
දාල යනුබැහැ තාම තනිකඩ දෙසිත සෙනෙහෙන් නැහැවිලා

සලා පියපත් සොයා සෙනෙහස සතුටකින් තුරුලට වෙලා
නෙලා රැකගත් නිසා  සිහිනය හැඟුම්බර වෙයි සිහිවෙලා
වලාකුළකත් තියා සිසිලස නවම් මහ ලස්සනවෙලා
බලා ඔය නෙත් ගියා ළතැවුල සුපෙම්බර සිත් ලංවෙලා....... 






(6)

Sunday, February 5, 2017

සතුටු වෙන්න පවුල් පිටින් නැවත දිනෙක ඇවිත් යන්න අපගෙ දෙනෙත් බලන් ඉන්නවා..........

රැල්ලෙ වැදෙන වැල්ලෙ හැපෙන මුහුදු හුළඟෙ ඔමරි බැල්ම
බලන් යන්න ඔබත් එන්නකෝ
ගතට සිතට සුවය සතුට නෙතට දැනෙන සිසිල් මිහිර
නොවිඳ ඔබත් යන්නෙ කොහොමදෝ
වැල්ලෙ පැදුර දිගට දමලා ළඟින් ළඟින් එකට ඉඳන්
කියන සින්දු අහන් ඉන්නකෝ
අතින් පයින් අඟර දමලා නටන පුංචි එවුන් දැකලා
සල්ලි නොදුන් අයත් ඉන්නෙදෝ

සිසිල් සුළං දැවටි දැවටි අඳුර සිසිල් කරන විටදි
සිරුරෙ ඔබගෙ නැතිද හිරිගඩූ
කොටන් ටිකක් කිට්ටු කරලා හොඳින් පත්තු කරපු විටදි
සිසිල දුවයි වෙමින් බියගුළු
ලුණත් එක්ක පදම් කරලා මිරිස් කුඩුත් ටිකක් දමපු
ඉරිඟු කරල් නටයි පුච්චපූ
රස්නෙ පිටින් දෙකක් තිහයි ඇවිත් ගන්න මුදල පොඩියි
නමුත් අපිට වගෙයි කහවනූ

ඔබගෙ හිතට දුකක් දුන්නු වැරදි දෙයක් අපෙන් වුණොත්
සිරස නමල වැඳලා කියනවා
නගරෙ ඉඳන් මෙහෙට ඇවිත් අපට මුදල් උපයා දුන්නු
ඔබට තුතිය මෙලෙස පුදනවා
යනෙන තැනක බලය තිබෙන ත්‍රිවිධ රත්නෙ පිහිට ඔබට
සැකක් නැතුව නිතර ලැබෙනවා
සතුටු වෙන්න පවුල් පිටින් නැවත දිනෙක ඇවිත් යන්න
අපගෙ දෙනෙත් බලන් ඉන්නවා..........





( තව 7 යි....)